高明：搬龍門之抵輸 ---新朋友請點上方 ”港股策略王” 關

---

新朋

友請點上方

”

港股策略王

”

關注我們

---

【高明邏輯】搬龍門之抵輸（高明）（第163期）

截稿前星期一，高明喺新城認低威，認一次早期嘅出錯，影響咗2月5日大跌當日嘅決定，既然都做錯，無理由收收埋埋，照講可也，先係高明邏輯嘅核心價值。

自從有咗臉書之後，財演廣泛化，任何有臉書專頁嘅人都可以做財演，而做財演就要跑like數、跑engagement數，以致生態出現改變，例如市面上出現部份神秘好倉或淡倉，喺趨勢行完之後突然報稱買中或糊已食，又或貼文在股價行相反方向後失蹤，以及為自己寫錯方向無限兜，諸如此類，以推高like數。高明閱後覺得係朱克伯格別有用心、分裂人民、破壞地球來之不易和諧、扭曲世人心靈嘅奸計，無意同其他人一齊中計，喺臉書入面為like自high，所以估錯估中都會照講。

入正題，錯嘅原因係最初搬龍門，1月一路升上嚟，高明喺專欄同電台策略王直播室都反覆嗌咪，一旦穿10天線至少要走一半，結果第一次穿10天線的確走咗一半，然後一個朝早又升返即刻買返齊，到再跌時麻目咗，結果搬龍門唔沽住，唔單止冇沽，仲要高位心雄再開牛證，因為1月太易贏，心雄。跟住？跟住就冇20天線俾你沽。

之後星期一低開，好啦，上次搬咗龍門出事，今次惟有跟返紀律止賺啦，點知下午又殺返上嚟。

本來以高明嘅認知以及事先定吓嘅策略，就算只係以收市點數跌356點計，本來至少都應該食少一半，甚至輕身撈貨。但第一個錯犯咗，之後好易接連犯錯，出現咗梅菲定律入面「任何可能會出錯嘅嘢，都會出錯」。

舊年低位28300點叫人買貨而唔係叫人沽貨，買上嚟都叫有唔錯回報。情況就好似當年AC米蘭對利物浦，假設1月係上半場，2月係下半場，上半場已贏3:0，半場休息梗係開支香檳慶祝啦，唔單止咁，仲覺得3:0贏得太少，換多兩個前鋒出嚟踢，點知下半場開波5分鐘，比數係3:3。

好彩嘅係，買股票唔使射12碼，交易大堂大鐘雖然唔停，但參與者可以選擇靠邊站，唔使強行繼續比賽。目前局面，暫時維持原判：啲股升返穿20天線先買返，唔到就由佢，舊年見識過，一升可以狂升，等穿位嗰幾蚊只係散紙，咁等穿先做囉。

當然上述舉動有機會引嚟旁人冷嘲熱諷，但始終高明都有修養，冇理由串返人轉頭，因為炒股票純綷求財，沒有必要為啖氣與他人爭辯。

=================================

揭頁版電子書同步上架，即刻

Click

入以下網址收看

http://subscription.winmoney.hk/

=================================

《港股策略王》手機

APP

iOS

：

http://appsto.re/hk/ysXocb.i

Android

：

http://play.google.com/store/apps/details?id=com.megahub.winmoney

港股策略王

手機

app #

更新

你今日下載咗未

掃一掃

QRCode(

二維碼

)

馬上關注"港股策略王"