[上海]上海人副吞头势 ?上海独白? 上海人|上海|吞头

文章图片
文章图片
当年白话文运动主帅胡适先生提倡写文章要多用口语、俗语。“吞头势”就是上海闲话里厢格口语俗语。
上海闲话用到“头势”两字格地方勿少，比如：老阿奶讲， “小囡白相吃力了，看伊格睏头势”；外婆看到大外孙长发头啷会得吃，日长夜大老人看了开心，也会讲， “吃头势真结棍，一口气好吃三块红烧大排骨” 。阿姨会得讲， “迭格小毛头哭起来凶头势，就是要人抱” 。弄勿好上海小美女会得嗔一句男朋友， “侬迭格人烦头势，阿拉勿睬侬” 。不过讲到“迭格人头势煞清” ，是指男士两根头发梳得规齐。
“吞头势”同以上讲格各种“头势”又勿大一样，哪能讲法子？上海人出上海，着了当地人衣裳，哪怕勿用讲一句闲话，立了嗨，一定会得畀人家认出来是个上海人；梗转来讲，外地人到上海，穿了一身淮海路（勿是南京路哦）大店家里买来格贵（沪音ju）衣裳，也勿用开口，一定畀人家另眼看待。上海人自有一副“上海人格吞头势” 。

文章图片
文章图片
口语、俗语格地域性交关强， “吞头势”三个字转成普通话，想了半天，我用“气质”两个字来代替。一个人气质好，板定有外表有内涵，畀人家一个好印象。老话讲“有诸于内，形诸于外” ，里厢没货色，外表是装不出来的。气质倒真勿好讲是娘肚皮里带得来的，因此后天格认知和认知格获得就是重中之重格因素。
一百多年前头上海开埠，多少西方商人、传教士、冒险家涌到上海，上海人勒拉（在）迭种中西政治、经济、文化大冲撞当中最早接触到西方文明。后来出于殖民化要求，一批又一批到上海滩格西方人通过教会活动办起了学校，上海人也就逐渐接受了西方现代教育。
历史上整个江南地区传统文化非常发达，西洋文化进入中国，上海领先了“西学东渐”潮流，江南文化加上西方文化，华洋一体，本土创新，铸就了有名格“海派文化” ，迭格历史积淀，也就形成了“上海人副吞头势” 。

文章图片
文章图片
笼统一句“上海人副吞头势” ，上海人自家讲起来是蛮有丰富格内涵的。有辰光会得听到讲， “倷勿要看老先生现在格卖相，凭伊副吞头势就晓得是‘圣·强势’出来格上海滩啷最后一代老克勒” 。经过风风雨雨，老先生身啷还留存了副“圣·强势”吞头势是哪能回事体呢？
“圣·强势”是以前上海圣·约翰大学（St.John’s University）格简称，迭所教会大学1879年诞生于上海，是中国第一所跟国际接轨格高等学府，第一个将西方现代教育引入中国。“圣·强势”开设了科学、哲学和艺术教育课程，用全英文讲课，而且十分强调礼仪、体育和课外活动，集中交汇之下，学生综合素质交关高，毕业以后可以免试进入美国耶鲁、哈佛和哥伦比亚等头牌大学深造。

文章图片
文章图片
上海圣·约翰大学
【[上海]上海人副吞头势 ?上海独白?】近百年来“圣·强势”出了著名外交家顾维钧、施肇基、宋子文，文学家邹韬奋、林语堂、张爱玲，大师贝聿铭、周有光，还有红色资本家荣毅仁、刘鸿生、黄炎培等等，名字一大串写也写勿落。分页标题
当年“圣·强势”首创了“荣誉制度”（Honour System），考试勿设监考！学生自家考卷上声明“此番大考，未曾助人，亦未尝求助于人” 。因此“圣·强势”里厢是呒没啥叫“作弊”两个字，出来的人侪讲荣誉诚信，自律自信，自尊自爱。由此可见“圣·强势”带来副“上海人格吞头势”了。
想勿到上海“圣·强势”一百多年之前实行格迭个荣誉制度，还传回美国本土去，现在更加自由了，一到大考这天，高兴啥地方做考卷侪好去，图书馆实验室、校园草地、小咖啡厅里……侪是埋头做考卷格人，反倒是课堂里空啷啷，呒没几个同学陪这位收考卷格助教老兄坐勒海。
上海是移民城市，迭些移民在日常生活中带来了许多口语、俗语，虽然是街头巷尾市井俚语，但是融合成海派文化里厢，多姿多彩，活色生香。
上海人嘴巴里有一句“亲兄弟，明算账” ，但凡涉及钱财，板定“你的，我的”分得煞清。交关经济学家讲过， “私有财产要有明确界限，产权界限越清晰就必定会讲诚实守信，市场交换分工合作也就有水平，就可以形成真正的互惠互利良好格环境” 。
上海人日常交往当中，区分人与人之间界限清晰到一分一厘。尤其谈生意，大家拿自家利益摆出来，互相尊重对方利益，勿是统吃独赢。生意谈妥定好契约，上海人又会讲一句——“闲话一句”！重契约重合同，守规矩讲信用，真是硬横得死脱！
但是迭副上海人格吞头势倒畀一些外地人看作是“上海人小器，斤斤计较” ，讲起来有点作孽八啦。“上海人副吞头势”长期被污名化，过去学堂里单位里讲迭副吞头势是“资产阶级派头，小资产阶级情调” ，有事呒事批评检讨两句，现在格两顶大帽子总算呒没了。但是最近网上出了个“怂”字，迭格是正宗格北方地区口语俗语，讽刺一个人软弱无能，胆小窝囊，碰着要紧关头就逃。迭格字套勒上海人头浪厢，啊是勿大公平啊！

文章图片
文章图片
听来听去讲上海人“怂” ，无非两点：对内，屋里厢勿像个“大老爷们” ，怕老婆，宝贝小囡，下班回到屋里做“马大嫂”（买、汰、烧），围只围单厨房间里忙个不停；对外，矛盾冲突再激烈尽打嘴皮子仗，只听见“侬哪能？”“侬哪能！”半日天勿动手！勿错，迭两条的确是“上海人副吞头势”；错格呢，是拿迭两条来丑化阿拉上海人！
当今世界文明不断地发展，从尊重女权到了平等女权，生活当中男士分担家务是极平常格事体。勿看见前两年网上拍摄到美国前总统小布什屋里门口倒垃圾格视频吗？近来网上又流传美国财政部长厨房间里吊只大围单汰碗，伊格老太婆适适意意坐了边啷小台子上，白相扑克牌打通关……侬啊好讲迭些男人“怂”伐？
上海人是勿相信拳头里出真理，只要大家讲道理，用勿着狠三狠四气势汹汹，碰勿碰就拔拳头。马路啷公交车上吵相骂是有，有辰光交关闹猛！不过绝大多数是“君子动口勿动手” ，拔拳头打相打格事体，我勿好讲“绝无” ，也是“仅有” 。常桩有人出来劝两句：“好了，算了，大家少讲两句……”两家勿袒护，双方勿坍台，一场风波就可以过去，大家各走各格路。如果争吵中有人恶语伤人，出格点闲话刚刚出口，边啷格人就会评判了：“嗳嗳，大家讲闲话文明点！”上海人拎得清，再勿识相，有道理也变得呒没道理，就此收口落蓬算数。
上海闲话里对劝相骂格人俗称“老娘舅” ，江南自古以来娘舅为大，囡圄出嫁娘舅朆到，嫁妆勿好出脚启程；屋里有事体分家当板定要娘舅到场主持公道。久而久之，社会上热心主持公道排解纠纷的人就畀大家尊称为“老娘舅” 。现实生活中主动扮演“老娘舅”角色格上海人真勿少见，四两拨千斤，各种纠纷就勿会升级。碰着事体大家讲道理，暴力程度自然就降低了。迭格是上海人副吞头势，也是现代人格文明进步表现，搭“怂”字浑身勿搭界。分页标题
人讲道理了就守规矩，如果拿守规矩看作“怂”就勿讲道理了。迭趟抗“新冠” ，上海人交关自律勿出来“扎堆” ，大家侪登勒屋里厢拿病毒闷闷杀。记得阿拉小辰光屋里厢一经关照：“人多格地方勿好去，轧啥个闹猛！”从小听到大，安全意识老早就建立了。迭趟真生活一来，哪能好惹出毛病来浪费宝贵医疗资源、畀政府添乱呢？
北欧式排队

文章图片
文章图片
想勿到有人讲“上海人怕死” ，迭格就忒小看阿拉上海人了。怂勿怂，关键时刻看行动！旧年小年夜中山医院钟鸣医生是上海第一位逆行驰援武汉格专家，从接到任务到出发上飞机只有一个钟头辰光，当中横里只打了只电话畀屋里关照一声，迭格就叫义无反顾，壮士气概！华山医院张文宏主任喊出了“共产党员跟我上”！危难关头迭句闲话砰砰响，上海人副吞头势是实括铁硬！

文章图片
文章图片
张文宏
每个地方侪有自家独特格文化观价值观，上海人副吞头势是上海迭座城市的海派文化精神，勒拉（在）每个上海人身啷格体现，是一种自我人格的形成和传承，阿拉上海人共有格独特禀性。迭趟上海人“抗新冠”真正做到了“卒然临之而不惊” ，格末也应该做得到“无故加之而不怒” 。对一些嘲笑啊、诋毁啊覅纠结，迭点素质大家要有。阿拉讲个“塑料普通话”只要有道理尽管讲，勿怕人家笑。上海人有自家做人格原则，也勿会姑息自家身啷格缺点，让上海人副吞头势继续承载上海滩曾经的历史，也见证阿拉现时格发展，大家讲对伐？
作者| 杨仲文
文编、视频制作 | 陈雷
美编 | 何亦平
图片来源于网络