【十三短打】卡卡，你的名字叫……帅哥卡卡挂靴

卡卡挂靴，并没令人意外，令人怀念系AC米兰有过型男帅哥云集嘅黄金岁月。

2017年，相信系对AC米兰球迷伤感嘅一年，虽然离队已久，但派路同卡卡（Kaka）呢两个全盛期都效力红黑兵团嘅星将先后告别，红黑趸肯定好唏嘘。卡卡全盛时期，系AC米兰「荷兰3剑侠」后最强年代，有力赢意甲之余，仲年年都系欧联争标份子。

当年AC米兰有佢、恩沙基、舒夫真高，仲有老将马甸尼、哥斯达古达，系绝无仅有嘅型男帅哥兵团。当年意甲外援质素仲好高，又点似家阵咁良莠不齐，岩岩巉巉？

呢个巴西白白净世纪初已经喺巴西球坛崭露头角，到真正响朵系2002韩日世界杯，开始颠倒众生。除咗一张俊脸，佢球技确系出众，盘传射都掂，依家喺明日黄花嘅意甲想搵同等质素外援，太难。

2007年卡卡攞金球奖，算为意大利球坛争光，之后10年，就进入美斯同基斯坦奴朗拿度玩晒嘅年代。

怀念AC米兰同意大利球坛有过一段风光。怀念球坛曾经有呢个踢得又睇得嘅帅哥！

卡卡入过唔少金球，包括当年喺欧联对拉科鲁尼亚入嘅靓波，系十三其中最锺意嘅。从控定到顺势射波动作一气呵成，嗰球波，你估咁易控得靓？