陳承龍：再行蚺蛇尖 ---新朋友請點上方 ”港股策略王” 關

---新朋友請點上方 ”港股策略王” 關注我們---

【實力取勝】再行蚺蛇尖（陳承龍）（第151期）

一場小病，真係令小弟諗咗好多嘢，而啟發到諗到新嘢，係同圖太郎同圖太太行山開始。上個星期日，小弟再次挑戰香港三尖之首——蚺蛇尖，當年行呢個只得468米高嘅山，真係輕鬼鬆，十年後嘅今次雖然有策略王「山系型男」圖太郎帶路，但都行到氣咳。話說當日天氣唔係咁好，蚺蛇尖都幾大霧，睇唔清前路，最尾嗰段仲係70度直上，好鬼攞命，啱啱病好就行段咁攞命嘅，如果唔係平日做開gym，相信都好難完成到全程。

小弟行完第一段時已索晒氣，圖太郎仲好精力咁喺度做直播，望住第二段開始更斜，第三段更更更加斜，真係有啲想放棄，完全感受到上呼吸道唔舒服，令我決定戒煙戒酒。行到半路，上又唔係落又唔係，但行山同做嘢一樣，唔可以半途而廢，決心做一件事，堅持堅持再堅持，唔好嘅嘢唔做，對件事有幫助嘅就做足啲，咪可以行到上頂咯。其實小弟都keep住做gym，但原來都係好唔夠氣，希望戒煙戒酒可以有幫助，同埋例如食消夜呀、飲甜嘢，諗返自己幾年前鋼條咁嘅身形，再望望鏡入面嘅自己，真係要努力。另外，今次行蚺蛇尖，一定要多謝圖太郎，係佢鼓勵我繼續行，因為我一度想放棄，仲有圖太太做我哋攝影師。

太重覆嘅生活，令人麻木，有時，我哋真係需要「改變」。就好似炒股咁，低位買入高位賣出，又買又沽再買再沽，重覆又重覆，幾好定力嘅人都會覺得迷失，小弟有位向來投資審慎嘅行家，都突然話要買某隻股票，而目標價係一倍，嚇到我呆一呆，所以調節自己態真係好重要，你以為自己係理智，其實可以好唔理智。喺我病同輕輕發脾四期間，好多fans都私訊我，畀咗好多關心同意見小弟，真心感謝每個意見，哈哈，講呢啲係咪好唔似小弟風格呢？風格邊有得捉?，呢個階段嘅小弟，就好似日前行完蚺蛇尖第一段咁，停一停諗一諗，堅持落去就會去到目的地。唔講咁白啦，再講就好老土，明就明唔明就黎明啦。

=================================

揭頁版電子書同步上架，即刻Click 入以下網址收看

http://subscription.winmoney.hk/

=================================

《港股策略王》手機APP

iOS：http://appsto.re/hk/ysXocb.i

Android：http://play.google.com/store/apps/details?id=com.megahub.winmoney

#港股策略王 #手機app #更新#你今日下載咗未

掃一掃QRCode(二維碼)馬上關注"港股策略王"