【美食】火鍋街｜一條街食盡羊腩煲、醉雞鍋、粥底火鍋 8大特色郀
澳門百老匯組織咗一條「火鍋街」，趁天氣又凍過弟弟，更系想打番個熱辣辣嘅邊爐啊！火鍋街每間店都有一款推介，今次嚴選8款特色邊爐煲仔菜，值得你參考一下！一起開始睇睇喇！
澳門火鍋街：01 | 古法炭爐 街邊吃燜羊腩煲
首先推介李家菜古法燜羊腩煲，只在秋冬限定供應！凍冰冰想暖胃就最啱，記者訪問經理嘅時候，佢仲話熱辣辣嘅羊腩煲平均一日可以賣到70個！無論係夜晚定係晏晝都好多人幫襯！首間李家菜2000年喺十月初五街開設，至今有17年歷史。主打懷舊氣氛同宵夜，受到澳門人熱愛。
李家菜：古法燜羊腩煲（秋冬限定）| MOP208
熱辣辣嘅羊腩煲熱氣騰騰，睇到都暖晒！
食羊腩又點可以冇醬汁呢？腐乳醬就係最佳配搭啦！
而且呢個羊腩煲特別之處係用咗炭火嚟打邊爐，所以會特別惹味，一大班朋友圍住個爐暖笠笠咁吹水，簡直就係人生一大樂事啊！
羊腩煲用炭火爐加熱，所以味道會特別香濃！
佢哋仲會好貼心咁特別安排室外座位，十足大牌檔氣氛！
李家菜
營業時間：12:00nn-3:00pm，5:00pm-1:00am
地址：百老匯美食街，E-G028
02 | 香噴噴 花雕醉雞鍋
皇冠小館主打花雕醉雞鍋，打邊爐食番個嫩滑嘅醉雞鍋就啱晒啦！清新嘅花雕味在湯底裡面滲透出嚟，大大隻新鮮雞加埋藥材配料，好味又養生！
花雕醉雞鍋 | 半隻 MOP108、一隻 MOP198
每一隻雞首先用花雕醃好！
經理話畀我知，湯底加入好幾種中藥材配料，藥味十足，放入雞件之後等8分鐘，呢個時候嘅雞肉最嫩滑，就啱啱好可以食喇！
秘製湯底第一次煲滾之後，首先加入中藥材配料熬煮。
第二次水滾嘅時候，加入醃好嘅雞。
皇冠小館
營業時間：11:00am-12:00mn
地址：百老匯美食街，A-G017
03 | 70年秘方 秘製牛雜蘿蔔鍋
梓記牛什喺澳門有幾出名相信大家都知道，百老匯原來都開咗分店，同樣有驚喜！此店的牛雜用上超過70年嘅秘方炮製，牛雜蘿蔔鍋裡面嘅牛雜同蘿蔔都燜得好腍又入味，如果食得辣，記得點埋秘製辣椒油，超讚啊！
梓記牛什：牛雜蘿蔔鍋 | MOP138
紅色招牌好易認！
店舖裝修簡潔乾淨，比起街市老店更舒適。
梓記牛什
營業時間：11:00am-1:00am
地址：百老匯美食街，E-G026
04 | 葡式秘製咖喱蟹
去澳門想食葡國菜？福龍葡國餐主打正宗葡國菜，秘製咖喱蟹就係佢哋為火鍋街而預備嘅煲仔菜式！鮮甜大隻嘅蟹配上咖喱汁，配飯吃一流，睇見都流晒口水！
福龍葡國餐：秘製咖喱蟹（原隻）| MOP488
淋上香甜嘅咖喱汁，啖啖鮮味蟹肉！仲可以食餐包配埋佢嘅咖喱汁啊！
福龍葡國餐嘅枱櫈都好有葡國特色，而且可以揀室內或者室外座位添！
福龍葡國餐
營業時間：12:00nn-3:00pm，6:00pm-11:00pm
地址：百老匯美食街，A-G005-G009
05 | 鮮味豬雜粥底火鍋
新馬路成記粥品嘅豬雜粥底火鍋，用咗招牌又綿又滑粥底，加埋豬雜等嘅配料打邊爐，之後仲可以食埋個粥，一定夠晒飽！
新馬路成記粥品：豬雜粥底火鍋 | MOP138
新馬路成記粥品就喺梓記牛什隔籬，門口有大大個綠色招牌！
餐廳牆上仲有唔少名人幫襯嘅合照，裝修富有地道風格。
新馬路成記粥品
營業時間：11:00am-1:00am
地址：百老匯美食街，E-G025
06 | 日式shabu shabu 豐盛海鮮鍋
食厭咗中式火鍋，想轉新口味？可以試下日式shabu shabu！千笹日本料理嘅熊本黑大豆辛辣味噌海鮮鍋，濃郁嘅湯底，加上各種各樣嘅海鮮，真係鮮味十足啊！
千笹日本料理：熊本黑大豆辛辣味噌海鮮鍋 | MOP 288
門口係典型式裝修！
裡面仲有個大紅燈籠添，好有氣氛啊！
千笹日本料理
營業時間：12:00nn-3:00pm，6:00pm-11:00pm
地址：百老匯美食街，A-G018, A-1001
07 | 香辣暖胃 正宗重慶麻辣雞煲
重慶麻辣雞煲一向都係港人最愛，巴山酸辣粉就可以食得到！來自四川嘅師傅特別炮製咗自家麻辣醬料，將雞肉同多種香料一齊爆炒，食完仲可以加湯打邊爐！
巴山酸辣粉：重慶麻辣雞煲 | 半隻 MOP108、一隻 MOP198
圓枱啱晒一班朋友圍住個爐食雞煲啦！
巴山酸辣粉嘅招牌有團火?！肯定夠晒辣！
巴山酸辣粉
營業時間：11:00am-12:00mn
地址：百老匯美食街，A-G019
08 | 惹味台式三杯雞煲
唔想打邊爐又想食熱辣辣嘅嘢？煲仔菜就啱晒你喇！百老匯嘅度小月有款台式三杯雞煲，食落好香嘅九層塔味，雞肉嫩滑甜甜哋，一試難忘。
度小月：台式三杯雞煲 | MOP108
度小月門口仲有可愛嘅熊啤啤，可以坐喺佢隔籬一齊影相！
度小月店內嘅裝修仲好有台灣嘅特色！
度小月
營業時間：11:00am-12:00mn
地址：百老匯美食街，A-G014-16
（文章及配圖來自gotrip.hk）
- 名扬美食：超级酱牛肉绝顶做法不传秘籍！
- 明天回丈母娘家下厨做饭，今天先学几道美食吧
- 泰国华人小馆品尝一款“潮汕美食”，看着有些怪，吃起来真是香！
- 据说这些是湖北人最喜欢的湖北美食，有你喜欢的吗？舌尖上的中国
- 蟹棒是过年吃火锅的必备美食，可它和螃蟹没任何关系，看加工过程
- 永年春节必吃美食，砂锅慢炖约10小时，“永年酥鱼”连鱼骨都能吃
- 北方街头常见的美食小吃，吃了以后全身暖暖的
- 中国的这些美食竟另外国人纷纷作呕，相信你也吃过
- 流感好了，小刘却无法张嘴吃饭了，面对过年美食，小刘苦恼着
- 我的朝鲜美食之旅，在朝鲜能吃得饱吗？