广州有种油腻中年，叫「麻甩佬」人到中年

呢几日，作家冯唐喺微博发咗一篇文章《如何避免成为一个油腻的中年猥琐男》，我嘅朋友圈微博几乎被“油腻中年男”、“庸俗中年女”洗版。

? 洗版：在网络上短时间内发送冲偶像同的信息，相当于刷屏

文章内容有人赞有人弹，但的确讲中咗好多人对中年人嘅印象，堪称70后睇咗会反驳，80后睇咗会沉默，90后睇咗会叫好。

其实喺广州，都有种油腻中年男，就叫「麻甩佬」。

?麻甩佬：专门称呼粗鲁男人嘅粤语俗语。

讲到麻甩佬，你脑海中肯定“自动回复”几个重要关键词，大肚腩、背心、孖烟通、人字拖、咬住支牙签，呢啲都系一个麻甩佬嘅终极标配。

?孖烟通：男人穿的四角内裤

而广州系一个市井气息浓郁嘅城市，所以行喺街上，随便都可以见到一两打麻甩佬，千篇一律都系着得非常随便，感觉就系随便着套睡衣就出门口。

而佢哋嘅“麻甩”行为，有时候真系令人顶唔顺。

小沅子：最讨厌啲麻甩佬喺公共场合讲电话，讲到鬼死咁大声，慌死周围啲人听唔到佢讲嘢，仲要一句话夹杂几个粗口，听到都要洗耳。

鱼乐：有次出街见到个阿叔着背心，但间外套搭喺膊头，然后露出半边肚腩，大摇大摆行喺条街上，讲真阿叔，我真系唔好想欣赏你个肚腩咯。

阿咩：落雨天搭地铁，一个麻甩佬当众除鞋，企图晾干只脚，嗰阵味真系……

所以有好长一段时间，「麻甩佬」一词都带有贬义，因为叫得做麻甩佬，除咗系话一个男人不修篇幅、蓬头垢面，更加系讽刺紧佢嘅行为粗放、毫无形象。

更唔好讲一啲唔尊重他人（特别系女性）嘅「麻甩佬」。

公司之前接待过一个中年客户，开口埋口就会讲“我有个咩咩朋友喺边度做”、“我识得啲咩好巴闭人”，后来有一次见到佢朋友圈发饭局嘅合照，全程基本上揽住隔离女生条腰，成个人黐埋去女生身上，隔住屏幕都可以感觉到个女生有几抗拒。

每次见到呢啲“麻甩佬”行为，我都觉得非常讨厌，希望永远唔好同呢种人有咩交集。但讲到底，究竟我哋讨厌嘅系「麻甩佬」，定系部分「麻甩佬」嘅低素质？

冯唐嘅文章可以成为一个热点，其实都系因为文章提出咗一个词“油腻中年男”，令到好多人尝试去解读何为“油腻中年男”。

▲网友总结的20条油腻中年男标志

当你认真睇完20条标志，你会觉得其中有啲标志十分莫名其妙。

“用左右翻开的手机壳”、“家里穿秋裤当居家裤”、“保温杯泡红枣同枸杞”、“摆各种佛像”，呢啲行为或者系大部分“麻甩佬”、“中年男人”会有嗰行为，但亦无伤大雅，更谈不上油腻。

如果真系要搵一个男人完全唔做以上20种行为，恐怕就只有韩剧中嘅完美男主角。

而且年轻一代自己亦会有好多所谓嘅「麻甩佬」行为，一样会落楼下着得随便啲，一样会戴老窦老母唔理解嘅饰物，一样会教训比自己后生嘅00后获得优越感。

咁唔通我哋又要叫“油腻青年人”或者“麻甩仔”？

▲今日随便行喺街，都会见到一个“麻甩仔”

生活中会有粗鄙猥琐嘅后生仔，亦会遇到善良低调嘅麻甩佬，所以，年龄区间唔系重点，你嘅素质高低、行为有冇影响他人先系衡量一个人嘅标准。

如果一个人善良、素质高、尊重他人，就算佢身型走样、衣着随便都唔会令人反感，就好似几年前香港嘅真事改编漫画《麻甩佬的浪漫》。

▲圣诞前后，一个麻甩佬见到茶餐厅一对爷孙冇钱食饭，两人只叫一个A餐，就默默买多一个A餐畀佢哋。

至于一个人身型衣着、饮食习惯，其实系佢嘅自由，每个人都有权利选择自己中意嘅生活方式，嗰啲避免油腻嘅建议或标准，都不过系自视高人一等嘅偏见。

喺呢个年代，用标签定义一类人系非常容易嘅一件事。

就好似粤语之中，形容一个男人唔同阶段唔同状态嘅词非常多，几乎可以组成一个男人成长血泪史。

形容后生啲嘅男性就有——

?花靓倞：十几岁年轻人，性格一般、冇咩感情经历

?油脂仔：油腔滑调、说话好似成人一样的早熟男生

形容中老年男性又有——

?中坑：中年人，由「老坑」一词繁衍而来

?老坑：老年人，带有不尊重的意思

当后生仔形容中年人为“麻甩佬”、“油腻中年男”，其实后生仔何尝唔系中年人眼中嘅“花靓倞”、“油脂仔”？

所有嘅标签，其实都系一张张人为黑箱操作嘅罪状纸，定好罪名，就不停向入边填罪状，然后一竹篙揇沉一船人。

?一竹篙揇沉一船人：一根竹竿把一船人打下水去，比喻不分青红皂白打击一大片人，伤害无辜

香港跑马地天主教坟场大门前有一副好出名嘅对联：“今夕吾躯归故土，他朝君体也相同。” 原意系提醒每个前来凭吊嘅人，唔好忘记自己正在老去，始终会有面对死亡嘅一日。

衰老系每个人嘅必经过程，他朝当你被划入中年人嘅行列，可能亦有一班后生仔女企出嚟嘲讽你，对你嫌三嫌四。

所以话，与其嘲讽你睇唔顺眼嘅“麻甩佬”，不如先检讨自己有冇啲低素质行为，避免成为以后年轻人口中嘅“油腻男”、“麻甩佬”。

↓如果你得闲冇嘢做，不如点下呢度！